សង្គមស៊ីវិលថា ពលករខ្មែរមកពីថៃកំពុងប្រឈមបញ្ហាបាត់បង់ការងារ និងកង្វះស្បៀងអាហារ

លំហូរពលករខ្មែរដែលសម្រុកមកពីប្រទេសថៃតាមច្រកអន្តរជាតិ និងច្រកល្បៀងនានាមានយ៉ាងតិច១ពាន់នាក់ក្នុងមួយថ្ងៃ ដោយសារការឆ្លងរីករាលដាលនៃជំងឺកូវីដ១៩ និងបញ្ហាអត់ការងារធ្វើ។ នេះបើតាមការលើកឡើងរបស់លោក ឃុន ថារ៉ូ អ្នក​គ្រប់​គ្រង​កម្ម​វិធី​ការ​ងារ​នៃ​មជ្ឈ​មណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស ។ ប៉ុន្តែលោកបញ្ជាក់ថា ពលករខ្មែរដែលមកដល់ប្រទេសកម្ពុជាវិញនៅពេលនេះ ពួកគេកំពុងជួបប្រទះវវិបត្តិធំៗចំនួន៤ រួមមានជាអាទិ៍ បញ្ហាបាត់បង់ការងារ បញ្ហាកង្វះស្បៀងអាហារ បញ្ហាសុខមាលភាព និងបំណុលធនាគារ។

ក្នុងនោះ បញ្ហាបំណុលធនាគារ គឺជាបញ្ហាធំមួយសម្រាប់ពួកគេ។ លោក ឃុន ថារ៉ូ បានលើកឡើងថា ពលករជាច្រើនកំពុងបាត់បង់ប្រាក់ចំណូលស្នើពាក់កណ្តាល និងខ្លះទៀតបាត់បង់ទាំងស្រុងដែលមិនមានថវិកាឯណាទៅសងបំណុលធនាគារ។ ក្នុងន័យនេះ លោកចង់ឱ្យរដ្ឋផ្តល់នូវកិច្ចគាំពារក្នុងការសម្របសម្រួល ឬពន្យាពេលបង់ប្រាក់ក្នុងពេលមួយជាក់លាក់ដល់ពួកគេ។

មិនតែប៉ុណ្ណោះ អ្នក​គ្រប់​គ្រង​កម្ម​វិធី​ការ​ងារ​នៃ​មជ្ឈ​មណ្ឌល​សម្ព័ន្ធ​ភាព​ការងារ និង​សិទ្ធិ​មនុស្សរូបនេះក៏បានស្នើឱ្យរដ្ឋាភិបាលកម្ពុជាគួររៀបចំជំនួយសង្គមក្នុងរយៈពេលខ្លី ផ្តល់ការធានាផ្តល់សេវាសុខាភិបាលប្រកបដោយប្រសិទ្ធភាពជូនពលករ ដោះស្រាយផ្នែកបញ្ហាស្បៀងអាហារឱ្យបានត្រឹមត្រូវ និងជួយសម្រួលដល់បំណុលដែលពួកគាត់កំពុងជួបប្រទេះក្នុងពេលនេះ។

ឆ្លើយតបនឹងបញ្ហានេះ លោកហេង សួរ អ្នកនាំពាក្យរបស់ក្រសួងការងារបានបញ្ជក់ប្រាប់វិទ្យុបារាំងអន្តរជាតិនៅព្រឹកថ្ងៃអង្គារនេះថា ពលករខ្មែរដែលកំពុងអត់ការងារធ្វើនៅពេលនេះ គឺពួកគាត់គួរតែងាកទៅចាប់យកឳកាសនៅក្នុងរបរក្នុងវិស័យកសិកម្មវិញ ដោយសារវិស័យនេះទោះស្ថិតក្នុងវិបត្តិកូវីដ១៩ ប៉ុន្តែការនាំចេញ និងខ្សែសង្វាក់ផលិតកម្មនៅមានលំនឹងជាធម្មតា។

ដោយឡែក ពាក់ព័ន្ធនឹងបញ្ហាជំនួយសង្គមវិញ លោកហេង សួរ បានអះអាងថា ពលករដែលខ្វះខាតជីវភាពរស់នៅ គួរតែទៅធ្វើបច្ចុប្បន្នភាពពីបញ្ហានេះនៅភូមិ ឃុំដែលខ្លួនកំពុងរស់នៅ ដើម្បីទទួលបានកម្មវិធីសាច់ប្រាក់របស់រដ្ឋាភិបាលកម្ពុជា៕